Reykjadalsá í Borgarfirði

Eftir Hauk Þórðarson

Bæjarfljót

Bæjarfljótið er neðsti veiðistaðurinn í Reykjadalsá. Það veiðast ekki margir laxar þarna en það er alveg þess virði að skoða þennan stað þar sem maður getur hitt á göngurnar upp í ána. Áin er oft mjög lituð þarna af Hvítánni og þar af leiðandi sést ekkert niður í hana.

Klettsfoss

Klettsfoss er mjög fallegur foss rétt fyrir neðan brúna við bæinn Klett. Klettsfossinn hefur ekki verið að gefa marga fiska undanfarin ár, 1-2 laxar er algeng ársveiði. Tvær lænur eru þarna, önnur við minna rennslið og hin við aðalrennslið í fossinum. Best er að veiða í lænunum ofan frá fossinum.

Klettsfljót

Klettsfljót er yfirleitt sá staður sem skilar flestum fiskum í bókina ár hvert, Þetta er frekar stór staður og erfitt að vita hvar fiskurinn liggur fyrst um sinn. Fljótið er oftast veitt húsmegin og annað hvort kastað frá steinunum og út að brú eða beint út af grasbakkanum. Þessi staður hentar mjög vel til fluguveiða, þá sérstaklega með flotlínu.

Þúfukvörn

Ég fór í fyrsta skipti á þennan stað árið 2000. Það er frekar langt að ganga þangað því það er nánast ómögulegt að komast á bíl. Að mínu mati er þessi staður ekki erfiðisins virði því hann er nánast ónýtur, þarna er enginn einn djúpur hylur.

Mjóanesáll

Mjóanesáll er mjög skemmtilegur staður. Best er að leggja bílnum á túninu og varast að fara á honum út að bakkanum, vaða síðan yfir ána fyrir ofan hylinn og kasta frá eyrinni upp að stóra bakkanum og kemba allt svæðið. Ef ekkert gengur er ágætt að læðast upp á stóra bakkann og skyggna hylinn.

Hamarsgerði

Þessi staður getur verið mjög misjafn eftir því hvernig áin er. Það er grjót í miðjum hylnum sem laxinn liggur mjög oft við.

Klapparhola

Þessi staður er mjög sérkennilegur, þarna er djúpur skurður sem liggur þvert á ána. Það koma ekki margir laxar upp úr þessum hyl á hverju ári en hann getur legið þarna þó svo að maður sjái hann ekki. Best er að veiða á þessum stað með maðk og láta hann sökkva vel.

Ásgarðsfljót

Ásgarðsfljót er um 40 m fyrir ofan Klapparholuna. Þetta er frekar grunn breiða með mikið af gróðri og steinum. Lítið af fiski hefur veiðst á þessum stað og telst það til undantekninga ef lax kemur upp þarna.

Kársnesfljót

Kársnesfjót er langur strengur meðfram bakka. Eitt sumarið var þessi staður að gefa flesta fiska í ánni og eitt hollið tók, að mig minnir, 4 fiska þarna.

Sturlureykjastrengur

Sturlureykjastrengur var einn af betri stöðum í ánni fyrir nokkrum árum. Hann hefur eitthvað dalað undanfarin sumur en skilar alltaf sínu. Þegar komið er að hylnum sést mjög mikið af gróðri í botninum og oft stendur hann upp úr. Best er að kasta yfir þennan gróður og í rennu sem er rétt handan við gróðurinn, fiskurinn liggur oftast í rennunni þarna. Oft má fá væna silunga þarna innan um gróðurinn og ekki er vitlaust að prófa kúlupúpur ef annað hefur klikkað.

Grímsstaðaeyrar

Grímsstaðaeyrar er smábreiða rétt fyrir neðan Grímsstaðafljót, laxinn liggur oft í kringum grjótið sem er þarna í botninum. Búið er að sturta grárri möl þarna niður og oft liggur fiskurinn beint undir þeim bakka. Grímsstaðafljót tekur við beint fyrir ofan Grímsstaðaeyrarnar, fiskur getur verið úti um allt á þessu svæði.

Klofið

Klofið virðist vera staður sem hefur myndast eftir leysingarnar einhvern veturinn, þetta er mjög djúpur hylur og mjög stór, þarna er mjög oft lax en erfitt að sjá hann. Hann liggur þarna undir bakkanum við torfu sem er niðri í hylnum og er best að sökkva beitunni niður að fiskinum. Einnig er ekki vitlaust að prófa svæðið þarna fyrir neðan, stóru breiðuna og bakkann þarna 50 m neðar.

Breiðafljót

Breiðafljót er líklega sá staður sem kemur númer 2 í röðinni yfir bestu staðina í ánni. Það telst til undantekninga ef það er ekki fiskur í þessum hyl. Hægt er að veiða staðinn frá báðum bökkunum. Mjög gott er að standa á torfu sem er rétt fyrir ofan hylinn við stóra bakkann og kasta niður í miðjan hylinn. Einnig er hægt að veiða hylinn frá eyrinni hinum megin. Þá er gott að byrja efst og veiða niður. Helstu legustaðir laxsins eru 10 m fyrir neðan efsta hluta hylsins og 20 m neðar. Tilvalið er að ganga niður að Klofinu frá Breiðafljótinu því oft leynist fiskur í litlu hyljunum sem eru þar á milli.

Gilskjaftur

Þessi hylur er þar sem áin úr Rauðsgili kemur út í Reykjadalsána. Þetta er mikil breiða en sjaldan fiskur þarna.

Eyjafljót

Eyjafljót er eiginlega tveir hyljir, annar þeirra er þar sem merkið er upp á stóra bakkanum og hinn aðeins ofar við grasbakkann. Hylurinn við grasbakkann er mun dýpri og aðalhylurinn er neðst þar sem lítil torfa stendur upp úr. Annars er best að veiða allan hylinn meðfram grasbakkanum.

Tunnubakki

Þessi hylur er meðfram grasbakka rétt fyrir neðan þar sem vegslóðinn endar. Þessi hylur virðist verða betri með hverju sumrinu og oft er fiskur þarna. Ég setti litla járnplötu með númerinu á hylnum Skáhallt niður þar sem aðalhylurinn er og fiskurinn liggur oftast. Þarna rétt fyrir neðan virðist vera að myndast annar hylur og er tilvalið að prófa hann í leiðinni.

Torfbugur

Torfbugur var einn af betri stöðum í ánni en virðist vera að versna með hverju sumrinu sem líður. Aðalhylurinn er að fyllast af sandi og virðist laxinn ekki stoppa í þessum hyl lengur.

Hellufljót

Þetta er nýr staður sem fáir fara á því það liggur enginn vegslóði að þessum stað og þarf að ganga smáspotta að þessum hyl. Hylurinn er við grasbakka undir símastrengnum sem er þarna. Hylurinn virðist vera góður og oft sést fiskur þarna.

Búrfellsfljót

Búrfellsfljót var fyrir nokkrum árum tveir staðir, Búrfellsfljót neðra og efra, og voru með þeim betri í ánni fyrir nokkrum árum. Búrfellsfljótið virðist vera að lagast aftur eftir dálitla lægð og er kominn þarna aftur ágætishylur.

Símastrengur

Símastrengurinn er mjög góður staður á efsta svæði árinnar. Þetta er mjög djúpur hylur meðfram grasbakka. Best er að veiða efst í beygjunni og einnig niður með grasbakkanum. Skiltið sem merkir staðinn er beint fyrir ofan mesta dýpið í hylnum.

Grjótapollur neðri

Grjótapollur neðri er hylurinn kringum klettinn. Fiskurinn liggur oft þarna í beygjunni og einnig í straumnum meðfram klettinum. Best er að láta beituna sökkva vel niður, helst að láta hana snerta botninn. Ef veitt er á flugu er ekkert að því að veiða og láta fluguna sökkva vel niður því laxinn tekur oftast alveg við botninn.

Grjótapollur efri

Laxinn virðist oftar liggja í neðri pollinum en það kemur fyrir að fiskur er í þessum líka. Fiskurinn liggur oftast í miðjum pollinum og þarf að fara mjög varlega á bakkanum þarna.

Giljafoss

Það er mjög erfitt að stunda veiðar á þessum stað því það er stór steinn þarna í hylnum sem gerir manni ekki kleift að kasta almennilega í hylinn. Einhver sagði mér að prófa að veiða fossinn ofan frá og láta maðkinn detta niður í hylinn, það gæti verið svolítið mál að landa fiskinum en allt í lagi að taka sénsinn. Það er oft lax í fossinum en það er sjaldan sem hann gefur sig.

‍